நீங்கள் தேடியது "பெண் பயணி"

சென்னை:

சென்னை வியாசர்பாடியை சேர்ந்தவர் கருப்பசாமி. இவரது மனைவி விசால லட்சுமி(வயது 37). இவர் தனது உறவினர் வீட்டு திருமண நிகழ்ச்சியில் கலந்துகொள்வதற்காக கோவில்பட்டி சென்றிருந்தார். பின்னர் நேற்று முன்தினம் இரவு நெல்லை எக்ஸ்பிரஸ் ரெயிலில் சென்னை நோக்கி புறப்பட்டார். ரெயில் நேற்று மாம்பலம் ரெயில் நிலையம் அருகே வந்தபோது விசால லட்சுமி இறங்குவதற்காக தனது உடைமைகளை எடுத்தார். அப்போது அவருடையை 72 பவுன் நகை வைத்திருந்த பெட்டி காணாமல் போனதைக் கண்டு அதிர்ச்சி அடைந்தார்.

இது குறித்து மாம்பலம் ரெயில்வே போலீசாரிடம் விசால லட்சுமி புகார் அளித்தார். அதன்பேரில் ரெயில்வே போலீசார் வழக்குப்பதிவு செய்து விசாரணை நடத்தி வருகின்றனர். 

காட்மாண்டு:

நேபாள நாட்டில் சமாகான் என்ற இடத்தில் இருந்து நேற்று காலை 7.40 மணிக்கு தலைநகர் காட்மாண்டு நோக்கி ஆல்டிடியூட் ஏர் ஹெலிகாப்டர் புறப்பட்டது. இந்த ஹெலிகாப்டரில் ஒரு நோயாளியும், மேலும் 5 பயணிகளும் இருந்தனர். நிஷால் என்ற விமானி ஹெலிகாப்டரை ஓட்டினார்.

காலை 8 மணிக்கு கட்டுப்பாட்டு அறையுடனான தொடர்பை அந்த ஹெலிகாப்டர் இழந்தது.



இந்த ஹெலிகாப்டர் காலை 8.18 மணிக்கு காட்மாண்டு போய்ச் சேர்ந்து இருக்க வேண்டும். கட்டுப்பாட்டு அறையுடனான தொடர்பை இழந்ததால், ஹெலிகாப்டர் விபத்துக்குள்ளாகி விட்டதோ என்ற அச்சம் ஏற்பட்டது.

இந்த நிலையில், அந்த ஹெலிகாப்டர் தாடிங், நுவாகாட் மாவட்டங்களையொட்டிய அடர்ந்த காட்டில் விழுந்து நொறுங்கி விபத்துக்குள்ளானது தெரிய வந்தது. இந்த கோர விபத்தில், விமானி நிஷால் உள்ளிட்ட 6 பேர் பலியாகினர்.

உடனடியாக அங்கு மீட்பு படையினர் ராணுவ ஹெலிகாப்டரிலும், ஒரு தனியார் ஹெலிகாப்டரிலும் விரைந்தனர். லோ அனி டோல்மா என்ற பெண் பயணி மட்டும் காயங்களுடன் உயிர் தப்பினார். அவர் மீட்கப்பட்டு, உடனடியாக மருத்துவமனைக்கு கொண்டு செல்லப்பட்டார். பலியான 6 பேரது உடல்கள் மீட்கப்பட்டன. இந்த விபத்துக்கான காரணம் உடனடியாக தெரிய வரவில்லை. விசாரணை நடத்தப்படுகிறது.  #Choppercrashes #NepalChoppercrash

புதுடெல்லி:

நியூயார்க்கில் இருந்து நேற்று புதுடெல்லிக்கு ஏர் இந்தியா விமானம் வந்தது. அதில் பயணம் செய்த ஒரு பயணி, அளவுக்கு அதிகமாக மது அருந்திய நிலையில் தள்ளாடியபடி அங்குமிங்கும் சென்றுள்ளார். பின்னர், ஒரு பெண் பயணியின் இருக்கையில் சிறுநீர் கழித்துள்ளார். இது அந்த பெண் பயணி மற்றும் சக பயணிகளை முகம் சுளிக்க வைத்தது.

இதுபற்றி விமான ஊழியர்களுக்கு தகவல் கொடுக்க, அவர்கள் வந்து பெண் பயணியை வேறு இருக்கைக்கு மாற்றி உள்ளனர். விமானம் டெல்லி வந்து சேர்ந்ததும், அந்த பெண் பயணிக்கு நேர்ந்த அவமரியாதை மற்றும் அதிர்ச்சி அனுபவம் குறித்து அவரது மகள் இந்திராணி கோஷ் டுவிட்டரில் பதிவு செய்துள்ளார்.

ஏர் இந்தியா விமானத்தில் தனது தாய் விமானத்தில் பயணம் செய்தபோது, அவரது இருக்கையில் போதையில் இருந்த ஒரு பயணி ஒருவர் சிறுநீர் கழித்தது தொடர்பாக நடவடிக்கை எடுக்கும்படி இந்திராணி கோஷ் பதிவிட்டுள்ளார். அதில், மத்திய மந்திரிகள் சுரேஷ் பிரபு, சுஷ்மா சுவராஜ் மற்றும் ஏர் இந்தியா நிறுவனத்தை டேக் செய்திருந்தார்.

இதையடுத்து நடந்த சம்பவம் பற்றி விசாரணை நடத்தி விமான போக்குவரத்து அமைச்சகம் மற்றும் சிவில் விமான போக்குவரத்து ஆணையத்திற்கு அறிக்கை அளிக்கும்படி ஏர் இந்தியா நிறுவனத்திற்கு விமான போக்குவரத்து துறை இணை மந்திரி உத்தரவிட்டுள்ளார். மேலும், பெண் பயணிக்கு நேர்ந்த மோசமான அனுபவம் மிகவும் துரதிர்ஷ்டவசமானது என்றும் ஜெயந்த் சின்கா தெரிவித்துள்ளார். #AIFlight #DrunkPassenger

கரூர்:

சென்னையில் சமீபத்தில் ரெயில் படிக்கட்டில் தொங்கியபடி பயணம் செய்ததில் உயிரிழப்பு ஏற்படும் வகையில் அடுத்தடுத்து விபத்து சம்பவம் நிகழ்ந்தது தமிழகம் முழுவதும் அதிர்வலைகளை ஏற்படுத்தியது. மேலும் ரெயிலில் பயணம் செய்யும் பெண்களிடம் நகை பறிப்பு உள்ளிட்டவையும் அவ்வப்போது நிகழ்ந்தன. எனவே இது தொடர்பாக விழிப்புணர்வு ஏற்படுத்தி ரெயில் நிலையங்களில் பாதுகாப்பினை மேற்கொள்ள வேண்டும் என தென்னக ரெயில்வே அறிவுறுத்தியது. அதன்படி கரூர் ரெயில் நிலைய ரெயில்வே பாதுகாப்பு படை போலீஸ் பிரிவு சார்பில் பெண் பயணிகளின் பாதுகாப்பு மற்றும் ரெயிலில் ஆபத்தான பயணத்தை தவிர்ப்பது தொடர்பான விழிப்புணர்வு நிகழ்ச்சி நேற்று நடந்தது. இதில் கரூர் அரசு மகளிர் மேல்நிலைப்பள்ளி மாணவிகள் 100-க்கும் மேற்பட்டோர் பதாகைகளை கையில் பிடித்தபடி கரூர் ரெயில் நிலையத்தில் ஊர்வலமாக சென்றனர். இதனை கரூர் ரெயில்வே பாதுகாப்புபடை இன்ஸ்பெக்டர் தர்மாராம் பவாரி தொடங்கிவைத்தார்.

அப்போது சமூக முன்னேற்றத்துக்கு அடித்தளமாக இருக்கும் பெண்களிடம் பாலியல் சீண்டல்களை செய்யலாமா?, பெண்கள் நம் நாட்டின் கண்கள் என்பன உள்ளிட்ட கோஷங்களை எழுப்பியபடியே மாணவிகள் சென்றனர். மேலும் ரெயில் பயணத்தின் போது பெண்கள் அதிக நகைகளை அணிய வேண்டாம், இரவு நேரத்தில் ஜன்னல் அருகே தலை வைத்துப்படுப்பதை தவிர்க்கவும், ரெயில் பெட்டி நுழைவு வாயிலில் நின்று பயணிப்பதை தவிர்க்க வேண்டும் என்பன உள்ளிட்டவற்றை வலியுறுத்தி ரெயில் பயணிகளுக்கு துண்டு பிரசுரம் வினியோகம் செய்யப்பட்டது.

அப்போது ரெயில் நிலைய குற்ற சம்பவத்தில் உடனடி நடவடிக்கை எடுக்க ஆர்.பி.எப். உதவி மைய எண் 182-ஐ அழைக்குமாறு பயணிகளுக்கு அறிவுறுத்தப்பட்டது. இந்த நிகழ்ச்சியில் கரூர் ரெயில் நிலைய மேலாளர் பாஸ்கர், ரெயில்வே பாதுகாப்பு படை சப்-இன்ஸ்பெக்டர் குணசேகரன், தலைமை ஆசிரியை விஜயராணி, உதவி தலைமை ஆசிரியர் பழனிசாமி உள்பட பலர் கலந்து கொண்டனர். 

சென்னை:

சென்னை எழும்பூர் ரெயில் நிலையத்தில் நேற்று காலை 11-வது நடைமேடையில் இருந்து சென்னை கடற்கரை ரெயில் நிலையம் நோக்கி மின்சார ரெயில் புறப்பட்டது. அப்போது அந்த ரெயிலில் 35 வயதுடைய பெண் அவசர அவசரமாக ஏற முயன்றார். எதிர்பாராத விதமாக அவரது கால் தவறி ரெயிலில் இருந்து கீழே விழுந்தார். நடைமேடைக்கும், ரெயில் பெட்டிக்கும் நடுவில் சிக்கிய அந்த பெண்ணை 11-வது நடைமேடையில் பாதுகாப்பு பணியில் இருந்த ரெயில்வே பாதுகாப்பு படை சிறப்பு பிரிவு வீரர் ஆர்.கே.மீனா விரைந்து செயல்பட்டு காப்பாற்றினார்.

இந்த செயல் குறித்து ரெயில்வே உயர் அதிகாரிகளுக்கு தெரிவிக்கப்பட்டது. விரைந்து செயல்பட்ட ரெயில்வே பாதுகாப்பு படை சிறப்பு பிரிவு வீரர் ஆர்.கே.மீனாவை ரெயில்வே அதிகாரிகள் பாராட்டினர்.